TEDxYouth@HaileyburyAstana: “What makes you truly unique?”
TEDxYouth@HaileyburyAstana осы кезге дейінгі сөйлеген алдыңғы қатарлы спикерлердің баяндамаларының YouTube желісіндегі TEDx Talks ресми арнасында жарияланғанын қуана хабарлаймыз. Бұл осы іс-шараны ұйымдастыруға толығымен атсалысып, аса жауапкершілікпен қараған мектебіміздің Халықаралық Бакалавриат бөлімі оқушыларының қол жеткізген зор жетістігі болып табылады.
2022 жылдың 11 маусым күні Haileybury Astana мектебінде жыл сайын болатын TEDxYouth@HaileyburyAstana конференциясы екінші рет өткізілді. Биылғы конференция "Бірегейлік" тақырыбына арналды. Шақырылған спикерлер мен қонақтарға бірегейлік концепциясын зерттеу ұсынылды.
Білім беру бағытындағы маңызды конференцияны ұйымдастыру Халықаралық Бакалавриат бөлімі оқушыларының біліктіліктері мен шеберліктерін паш еткен айтулы іс-шара болды. Екінші жыл қатарынан Haileybury Astana мектебінің Халықаралық Бакалавриат бөлімі оқушылары конференция тақырыбын таңдауға, спикерлер мен қонақтарды шақыруға, баяндамашылардың сөз сөйлеулерін жоспарлауға жауапты болып отыр. Өздерінің жауапты емтихандарының жақын қалғанына қарамастан, 12-ші және 13-ші сынып оқушылары мектепішілік ауқымды іс-шараны жоғары деңгейде өткізу үшін ауызбіршілік таныта отырып, бірлесе әрекет етті.
Айнұр Бекеноваға, Амер Асфурға, Бауыржан Сагиевке, Дәулет Мұхановқа, Кэти Личке, Мадина Сыпатаеваға, Санжар Базылжановқа және София Темирхановаға айтулы іс-шараны өз деңгейінде өткізуге қатысты керемет ойларымен бөліскендері үшін рақмет айтамыз.
Haileybury Astana мектебі TEDxYouth конференциясын өзінің жауапты да дарынды оқушыларынсыз өткізе алмаған болар еді. Әсіресе, Айгерімге, Роландқа, Көркем-Айға, Анаға, Наираға және Іңкәрге осындай тамаша мүмкіндік ұсынғандары үшін алғысымыз шексіз!
